বিহুৰ শুভকামনা

বিহ-হুৰ শুভকামনা 

 এইবাৰ ৰঙালীত অসমীয়া জাতি ( যদি আছে এতিয়াও) বহু ক্ষেত্ৰত চিন্তা মুক্ত হ'ল। খানাপাৰাৰ পথাৰৰ মেলা খনে আমাক নিশ্চিতি দিলে অসম তথা উত্তৰ-পূব ভাৰতৰ সংস্কৃতি ( খাদ্যৰ পৰা আৰম্ভ কৰি পিন্ধা উৰালৈকে ) বিশ্ব দৰবাৰত সিঁচৰতি হৈ পৰিল। এক কথাত বিশ্বৰ বিভিন্ন ঠাইত অসমীয়া বুলি ক'লে সকলোৱে চিনি পোৱা হ'ল। 

    সীমান্ত শেখৰে বিনামূলীয়া চিনেমা প্ৰদৰ্শন কৰি অসমৰ চিনেমাক এক উচ্চতা প্ৰদান কৰিলে। বাকী চিনেমা নিৰ্মাতা সকলেও অসমৰ চিনেমাৰ বৃহত্তৰ স্বাৰ্থত নিজৰ নিজৰ চিনেমা বোৰ বিনামূলীয়াকৈ দিবলৈ সাজু হৈছে। সীমান্তৰ এই বৈপ্লৱিক পদক্ষেপে অসমৰ চিনেমা বিপননৰ সমস্যা শেষ কৰি নতুন দিগন্ত সূচনা কৰিলে । এতিয়া চিনেমা হ'ল নালাগে, সীমান্ত শেখৰক বিনামূলীয়াকৈ চিনেমা দি দিয়ক । চিনেমা হিত হব‌ই । অৰ্থাৎ অসমৰ চিনেমাৰ ডাঙৰ সমস্যাটোৱে নাইকিয়া হৈ পৰিল । সকলো চিনেমা কৰ্মীয়ে এতিয়া নিচিন্তে ৰঙালীত মন প্ৰাণ সঁপি দিব পাৰে । 

    বঁটা প্ৰদান অনুষ্ঠানত  ফুকন চাৰৰ কথা শুনি সকলোৱে মনবোৰ সলনি কৰি ললে। বিশেষকৈ তাত থকা ৰাজনৈতিক নেতাসকলে । এতিয়াৰ পৰা ৰাজনীতিত বেয়া কাম নহয় । ৰাইজৰ উন্নয়ন হ'ব প্ৰথম আৰু শেষ কথা। অসমৰ ৰাইজ চিন্তা মুক্ত হ'ল। শাসক-বিৰোধীয়ে জনসাধাৰণক লগত লৈ জাতি, মাটি, ভাষাৰ বাবে কাম কৰিব । জনতাৰ কথাৰ বাহিৰে আন কথা আলোচনা নহ'ব । অসমীয়াৰ বাবে ইয়াতকৈ ভাল কথা কি আছে? 

  বিহুৰ দৰে সংস্কৃতি সদায় সুন্দৰ ভাৱে জীয়াই থাকিব। তাৰ প্ৰমাণ কম টকাৰে পতা টিংখঙৰ বিহুখন। ইমান কম টকাত বিহু হয় নেকি ? তাত সকলো গায়ক- গায়িকা, অভিনেতা, অভিনেত্ৰী, বাদ্যযন্ত্ৰী, অন্যান্য ক'লা কুশলীয়ে এক টকাও নোলোৱাকৈ কাম কৰিলে । এটাই মাত্ৰ লক্ষ্য- বিহু সুৰক্ষিত হৈ থাকিব লাগে । অসমীয়াক ইয়াতকৈ বেছি আৰু কি লাগে ? 

   আবেগিক অসমীয়াই কান্দি নেপেলাই তো ! 

   ইমান সুৰক্ষিত অসমীয়াই বিহু বুলি এতিয়া গা ঢালি দিব পাৰে । এইবোৰ দেখি চকু চৰহা অসমীয়া কেইটাৰ টোপনী যে নাহিব সেয়া খাটাং। 

ৰঙালী বিহুৰ শুভকামনা জনালো।